Денис Гордеев

Денис Викторович Гордеев — Чăваш халăх çыравçи. Сăвăç, прозаик, тăлмач, драматург, Раççей писателĕсен союзĕн членĕ, ЧР культурăн тава тивĕçлĕ ĕçченĕ, К.Турхан ячĕллĕ преми лауреачĕ. Денис Гордеев Комсомольски районĕнчи Асанкассинче 1938 çулхи çĕртме уйăхĕн 4-мĕшĕнче çуралнă. Ялти вăтам шкултан, И.Я.Яковлев ячĕллĕ Чăваш патшалăх пединститутĕнчен, Чулхулари партин аслă шкулĕнчен вĕренсе тухнă. 1961-1964 çулсенче Совет Çарĕнче хĕсметре пулнă. Ялти вăрманпром эртелĕнче, столярта, Комсомольскинчи «Октябрь ялавĕ» район хаçачĕн ответлă секретарĕнче, ялти вăтам шкулта учительте, унтан каллех тăван райхаçатăн яваплă секретарĕнче тата редактор çумĕнче, Муркашри «Çĕнтерӳ ялавĕ» райхаçат редакторĕнче, Чăваш кĕнеке издательствин директорĕнче, «Коммунизм ялавĕ» хаçатăн пай пуçлăхĕнче, Чăваш писателĕсен союзĕн правленийĕн литконсультантĕнче, СССР Литфончĕн Чăваш уйрăмĕн директорĕнче, «Тăван Атăл» журналăн пай редакторĕнче ĕçленĕ.